BUTUAN CITY – Nagpadala na usab kagabii ug laing 10-mil ka family food packs ang Department of Social Welfare and Development kon DSWD-Caraga ngadto sa Iligan City alang sa mga bakwit gikan sa Marawi City.
Kini na ang ikatulong hugna sa pagpadala ug tag 10-mil pesos, human niadtong Mayo 27 ug Hunyo 01. Sigon ni Eunice Montaos Plaza, Regional Information Officer sa DSWD-Caraga, ang kada food packs dunay sulod nga 6 ka kilo nga bugas, 8 ka canned goods ug 6 ka kape.
Sa tulo ka hugna nga pagpadala ug food packs sa mga evacuees sa Marawi City, miabot na kini sa kantidad nga halos 10-milyones ka pesos gawas pa sa mga non-food items nga mokantidad sa kapin 4-milyones pesos.
Gibutyag usab ni Plaza nga magpadala usab ang buhatan ug mga social workers aron motabang sa psychosocial processing sa mga evacuees.
Samtang gipahayag usab sa opisyal nga on going karun ang validation sa ilang buhatan sa mga evacuees nga gikan sa Marawi na miabot dinhe sa rehiyon.
Sa inisyal nga nakuhang impormasyon, dunay 11 ka pamilya ang anaa karun sa Bayugan City samtang 42 usab dinhe sa siyudad sa Butuan ug 5 didto sa Cantilan, Surigao Del Sur.
Ang lokal nga kagamhanan na matud pa ang naghatag ug relief assistance sa mga namakwit nga indibidwal. (Rolan Janea)
