BUTUAN CITY – Gikrusada sa Association of Mindanao Community Development Schools kon AMCDS ang pag-institutionalize sa Community-Driven Development Bill isip national framework sa sustainable ug inclusive governance.
Sumala sa hiniusang pamahayag sa nasangpit nga grupo, ang ka-walay partisipasyon sa publiko sa mga diskusyon ug pagmugna sa mga proyekto ug balaod sa Pilipinas ang hinungdan sa sistimatikong kahuyang sa pangobyerno.
Lakip sa maong pamahayag ang pagkundina sa mga anumalusong implementasyon sa multi-billion peso government infrastructure projects, partikular na sa flood control.
Sigon ni Roel Sayson, Presidente sa Association of Mindanao Community Development Schools, nga tumong sa Community-Driven Development Bill mao ang pahatag og gahum sa kumonidad nga maka identify sa problema sa ilahang lugar, ug pagmugna og sulosyon sa maong problema — inubanan usab sa mga technical experts sa pangamhanan.
Subay niini, sa kumonidad na usab largo ihatag ang budget nga gikinahanglan arun mahatagan og kasulbaran ang ilahang problema. Apan sumala ni Sayson, daghan matud pang babag sa nasangpit nga sugyot balaodnon, ilabi na kadtung mga kongresista nga dunay negosyong pinaagi sa pagpangontrata.
Dugang sa maong grupo, dili lang policy option ang nasangpit nga sugyot balaodnon, kundili usa ka normative ug ethical imperative nga tubag sa problemang kurapsyon sa Pilipinas. Pinaagi matud pa sa maong balaodnon, dili nalang tig-dawat ra ang mga katawhan sa kung unsa ang ipapasar nga proyekto sa sa pangamhanan alang kanila, kundili lakip na usab ang mga katawhan nga mangamot og tubag sa ilahang problema.
Ang pamahayag ni Roel Sayson, Presidente sa Association of Mindanao Community Development Schools. Sakop sa AMCDS ang mga higher education institution nga naga offer og degree programs sa Community Development, sama sa Mindanao State University Marawi ug Maguindanao, Bukidnon State University ug uban pa.
