BUTUAN CITY- Gihangyo ni Deputy Speaker Paolo Ortega V ang House Committee on Justice nga ilakip si kanhi Overall Deputy Ombudsman Melchor Arthur Carandang isip resource person sa hearing sa mga impeachment complaint batok kang Vice President Sara Duterte, ilabi na sa isyu sa Statements of Assets, Liabilities and Net Worth (SALN) ug ang giingong dili maipasabut nga bahandi.
Sumala ni Ortega, si Carandang adunay direktang kasinatian sa pagsusi sa bank records ug financial transactions nga konektado ni kanhi Presidente Rodrigo Roa Duterte ug sa mga miyembro sa iyang pamilya, lakip si VP Sara.
Nagtuo si Ortega nga makatabang ang kahibalo ni Carandang sa komite aron masabtan pag-ayo kung giunsa pagsusi sa mga imbestigador ang bank records ug SALN disclosures.
Si Carandang nagsilbi isip Overall Deputy Ombudsman gikan 2013 hangtod 2019 ug namahala sa dagkong kaso sa korapsyon sa buhatan sa Ombudsman.
Nahimong unod kini sa nasudnong balita niadtong 2017 sa dihang iyang gikumpirma nga nakuha sa Ombudsman ang bank transaction records gikan sa Anti-Money Laundering Council (AMLC) isip kabahin sa imbestigasyon sa plunder complaint batok kang kanhi Presidente Duterte ug sa iyang pamilya.
Si Ortega, nga usa sa mga nag-endorso sa ika-upat nga impeachment complaint batok kang VP Sara, mingbutyag nga ang testimonya sa mga eksperto sa financial investigations makapalig-on sa fact-finding sa komite.
Ang ika-upat nga impeachment complaint nagtumong sa giingong graft, bribery, procurement irregularities, unexplained wealth, ug misdeclarations sa SALN.
Nakita sa House Committee on Justice nga igo ang porma ug sulod sa complaint, gani nagpadayon ang mga pagdungog.
Sunod nga lakang mao ang pagsusi ug pagtino sa probable cause sa maong reklamo sa dili pa kini ihatag sa plenaryo sa Kongreso alang sa dugang nga aksyon.
