BUTUAN CITY – Hugot nga gikondena sa Sultanate of Oman ang makalilisang nga drone attack sa Port of Salalah niadtong Sabado, Marso 28, 2026, nga naka-angol sa usa ka trabahante ug nakadaot sa usa ka crane.
Duha ka drone ang mitarget sa pantalan, apan hangtod karon wala pa’y grupo nga miangkon sa insidente.
Isip tubag, temporaryong gihunong sa Danish shipping giant nga Maersk ang ilang operasyon sa Port of Salalah aron masiguro ang kaluwasan sa ilang mga personahe ug kargamento.
Nailhan ang maong pantalan isip usa sa pinakadako nga transshipment hubs sa rehiyon, busa nakahatag kini og dakong kabalaka sa global shipping industry.
Sa pakighinabi sa Star FM Bacolod, gipaambit ni Mary Jane Damacio, usa ka overseas Filipino worker sa Oman, nga nagpasalamat siya nga luwas sila tungod kay layo ang ilang pinuy-anan sa nahitaboan.
Matod pa ni Damacio, mabati gihapon ang kahadlok sa mga tawo didto sa nasod.
Padayon ang imbestigasyon sa gobyerno sa Oman aron mahibal-an kung kinsa ang nagpaluyo sa drone attack, samtang gipalig-on usab ang seguridad sa mga dagkong pantalan ug kritikal nga pasilidad aron malikayan pa ang susamang insidente.
