BUTUAN CITY – Nagsugod na paggamit sa drone technology ang mga mag-uuma sa humay sa dakbayan sa Butuan kansa mao nay gigamit sa pagsabwag og abono ug pesticide diha sa mga tanom nga humay.
Gipadayag sa City Agriculture and Veterinary Department kon CAVD nga dako ang bentaha sa paggamit sa maong teknolohiya tungod kay mapakunhod man niini ang gasto sa produksiyon, mas dali ang trabaho ug masulbad ang kakulang sa trabahante.
Tungod niini, gidasig ni CAVD Head Engr. Pierre Anthony Joven ang mga mag-uuma, ilabina kadtong adunay 20 ektarya humayan pataas, nga mugamit na sa drone technology aron mas taas ang ani ug mas lig-on ang kita. Ang maong teknolohiya napahimulsan pinaagi sa Drones4Rice Project sa Department of Agriculture – National Rice Program kansa gi-subsidize pinaagi sa voucher system.
Pwede na kining magamit sa mga kwalipikadong mag-uuma diha sa seeding, pag-andam sa tanom; pag-abono ug paghatag og nutrisyon sa tanom ingon man pagdumala sa peste ug sakit sa tanom.
Alang sa CAVD, usa ka dakong lakang padulong sa moderno ug teknolohiyang pinasikad nga pag-uma sa Butuan.
