BUTUAN CITY – Misaka na sa 12 ang gidaghanon sa mga namatay tungod sa bagyong Basyang, base sa pinakabag-ong report sa Office of Civil Defense (OCD) kondiin siyam sa mga biktima, natala sa Northern Mindanao (Region X) kondiin upat niini ang namatay tungod sa landslide sa Cagayan de Oro City, upat usab sa Lanao del Norte, ug usa pa ang kasamtangang gi-validate.
Sa Caraga region, iniisyal nga natala ang tulo ka patay tungod sa pagkalumos kondiin duha niini sa Surigao del Sur ug usa sa Agusan del Norte.
Sigon sa Philippine Atmospheric, Geophysical and Astronomical Services Administration (PAGASA), ang bagyong Basyang, lima ka higayong nag-landfall ug misaka pa sa tropical storm category sa wala pa kini mihuyang ngadto sa low pressure area pasado alas-2 kagahapon sa kaadlawon ug hingpit nga natunaw alas-8 sa buntag.
Sa pinakabag-ong situational report sa National Disaster Risk Reduction and Management Council (NDRRMC), 30 ka barangay sa Caraga region ang nabahaan samtang 64,360 ka mga pamilya ang apektado kon bugti sa 232,550 ka mga indibidwal gikan sa kinatibuk-ang 517 ka mga barangay.
Sa maong gidaghanon, 16,528 ka pamilya o 53,983 ka mga indibidwal ang nagpuyo sa 480 ka mga evacuation centers, samtang 4,489 ka pamilya o 16,807 ka indibidwal ang gisuportahan sa gobyerno gawas sa mga evacuation facility.
Duna usa’y natalang kadaut sa imprastruktura, lakip ang tulo ka kalsada ug duha ka tulay sa Caraga Region.
