BUTUAN CITY – Nangayo og dispensa ang kadumalahan sa Department of Public Works and Highways kon DPWH-Caraga ngadto sa tanang mga motorista nga nahasol sa gihimong actual traffic survey sa may tulay Magsaysay ning mi-aging adlaw.
Nasayrang gi-ulan og batikos ang nasangpit nga kalihukan kansa kabahin sa ilang feasibility study kondiin duna sila’y gikomisyon aron muhimo og actual survey sa ingon ma-ihap gayod ang tanang mga sakyanang nangagi sa maong tulay niadtong tungura nga naghatag og kabug-at sa dagan sa trapiko kansa dakong hasol ilabina nga init kaayo ang panahon niadtong mga orasa.
Sa eksklusibong pakighinabi ning sibyahan, gibutyag ni Connie Calo, ang tigpamaba sa maong ahensya, ila na kining gipahibalong daan kang Butuan City Mayor Ronnie Vicente Lagnada apan wala nila gipahibalo sa katawhan aron ila gayong makuha ang tinuod nga ihap sa mga sakyanang nangagi sa maong tulay.
Tumong niini nga makakuha sila og datus nga gikinahanglan alang sa umalabot unya nilang mga proyekto.
