BUTUAN CITY – Posibleng mawad-an og labaw sa ₱226 bilyon hangtod ₱232 bilyon ang ekonomiya sa Pilipinas kung ipatuman ang total deployment ban sa mga Overseas Filipino Workers (OFW) ngadto sa Middle East.
Sumala ni Arsenio Balisacan, kalihim sa Department of Economy, Planning, and Development, mahimo kining mahitabo kung mapa-uli na ang 550,000 ka mga Pilipino nga nagtrabaho karon sa maong rehiyon.
Gibutyag niini nga ang maong kantidad bugti sa dul-an 65% sa remittances o kwarta nga gipadala sa mga OFWs gikan sa Middle East padulong sa Pilipinas.
Tungod niini, dako ang mahimong epekto dili lamang sa mga OFW kundi sa tibuok ekonomiya sa nasod. Base sa datos sa Department of Foreign Affairs, adunay mga 2.41 milyones ka mga Pilipino nga nagtrabaho sa lain-laing nasod sa Middle East.
Pinakadaghan kanila atua sa United Arab Emirates nga mi-abot sa 975,000 nga gisundan sa Saudi Arabia nga adunay 813,000; Qatar – 250,000 ug Kuwait nga adunay 211,000 samtang adunay 31,000 ka mga OFWs sa Israel ug mga 800 ang nagtrabaho sa Iran.
Dugang ni Balisacan, ang bisan unsang lakang nga mopugong sa pagpadala og OFWs sa Middle East, makahatag og dako nga epekto sa remittances ug sa ekonomiya sa Pilipinas.-
