BUTUAN CITY – Dismayado si Department of Education kon DepEd Secretary Sonny Angara human migawas sa budget hearing sa Senado nga 22 ra ka mga classrooms ang natukod sa Department of Public Works and Highways kon DPWH, gikan sa kapin 1,000 nga target.
Sigon ni Angara, dili angay pasagdan ang kahimtang sa edukasyon, ilabina nga daghang estudyante ang nagklase sa mga tunghaan nga dili angay sa ilang gidaghanon kondiin ang uban, sa ilawom na sa punuan sa kahoy nagklase.
Gisaway ni Angara ang DPWH nga mas gipili ang flood control projects, nga halos doble ang pondo karong tuiga, samtang kulang ang alokasyon para sa edukasyonal nga imprastruktura.
Kini taliwa sa kamatu-uran nga angay unta nga ang mga proyekto sa edukasyon ang hatagan og prayoridad tungod kay kini ang pundasyon sa kaayohan ug kalambuan sa nasud.
Nanawagan siya sa mga ahensya sa gobyerno nga tarongon ang pag-apod-apod sa pondo ug siguruhon nga ang panginahanglan sa katawhan, ilabina sa sektor sa edukasyon.
Gitumbok pa ni Angara nga ang nag-unang hinungdan sa padayong backlog sa pagtukod og mga tunghaan mao ang anomalya sa Department of Public Works and Highways kon DPWH, partikular na ang sobra nga paggasto sa flood control projects samtang napsagdan ang sektor sa edukasyon.
Tungod niini, target karon sa DepEd nga utrohon ang sistema sa ingon, dili lang ang DPWH ang mahatagan og gahum nga mohimo og DepEd classrooms.
Hangyo niya nga i-lakip ang local government units, mga probinsya, syudad ug first class municipalities nga hatagan og kagahum nga makatukod og classrooms.
