BUTUAN CITY – Sa laing higayon, naghatag na usab og kalibog sa katawhan ning rehiyon sa Caraga kung kinsa ang tinuod nga milingkod karong regional director sa Department of Transportation kon DOTr.
Kini human parehong gibarugan sa mga kampo nila Patrick Gumaos og Engr. Nordie Plaza nga sila ang lehitimong nagdumala karon sa maong rehiyunal nga ahensya.
Sa eksklusibong pakighinabi ning sibyahan, gipadayag ni Gumaos nga sugod karong adlawa ang subli niyang paglingkod sa maong posisyon base na matud pa sa gihuptan niyang appointment order gikan kang Pangulong Rodrigo Duterte.
Genuine matud pa ang iyang katudluan human nahatagan og appointment order gikan sa Malakanyang partikular na sa Records Office.
Kini matud pa ang iyang gihikay dihang nag-leave of absence siya rason nga nahimong officer-in-charge sa ilang ahensya si Nordie Plaza.
Apan karong balik na siya sa iyang duty, balik na usab matud pa si Plaza isip assistant regional director sa DOTr-Caraga.
Samtang hugot nga gibarugan ni Cristina Casion – information officer sa DOTr-Caraga nga si Engr. Nordie Plaza pa gihapon ang ilang gi-ilang officer-in-charge sa ilang rehiyunal nga buhatan.
Kini human nga wala pa’y gipagawas nga kamanduan ang buhatan ni DOTr Sec. Arthur Tugade nga mag-recall sa iyang pagtudlo kang Plaza sa maong posisyon.
Sigon ni Casion, gawas pa usab kini sa ilang gitamdang court order nga si Plaza pa gihapon ang officer-in-charge sa maong buhatan.
Kini wala pa’y labot sa nasabutan matud pa nila Sec. Tugade, Undersecretary Reinier Yebra uban sa duha ka mga opisyal.
Giklaro pa ni Casion nga wala nila gikwestyon ang pagtudlo ni Pangulong Duterte kang Gumaos sa maong posisyon tungod kay prerogative matud pa sa pangulo ang pagtudlo sa tawong kasaligan niyang mudumala sa usa ka ahensya sa gobyerno.
Apan base matud pa sa administrative law, ang kalihim sa ahensya duna’y kagahom, kontrol og direktang superbisyon sa iyang ginsakpan. (Beth Ruiz)
