BUTUAN CITY – Abagahon sa Department of Health kon DOH-Caraga ang galastuhon alang sa pagpa-uli sa patay’ng lawas sa usa sa walo nila ka doktor nga namatay human na-hit-and run sa lungsod sa Santiago, Agusan del Norte pasado alas-8:30 kagabii.
Na-ila ang biktimang si Dra. Zuriele Gonzalez Arambulo, 28-anyos, dalaga, residente sa Cainta, Rizal og graduate sa Cebu Institute of Medicine.
Sigon ni DOH-Caraga regional director Jose Llacunasa eksklusibong pakighinabi sa Bombo Radyo Butuan, bag-uhay pa lang mi-abot ang biktima dinhi sa Caraga Region niadtong Miyerkules aron i-deploy unta sa lungsod sa Santiago isip kabahin sa ilang programang ‘Doctors to the Barrios’.
Gikan matud pa sa pag-atiman sa iyang mga papeles dinhi sa siyudad sa Butuan ang biktima kagahapon og padulong na unta sa iyang place of assignment sakay sa usa ka bus apan pagkanaog niini, kondiin patabok na unta siya sa national highway dihang nabanggaan kini sa kusog mipadagan nga sakyanan.
Tungod sa kakusog sa impact nalabay ang biktima rason nga dead-on-arrival na kini dihang gidala sa Cabadbaran District Hospital. (Bombo Beth Ruiz)
