BUTUAN CITY -Hugot nga gibantayan sa Department of Health (DOH) ang presyo sa mga tambal tungod sa nagpadayon nga oil crisis..
Sigon ni DOH spokesperson ug Undersecretary Albert Domingo, padayon ang ilang monitoring samtang nagpatuman usab sila og ubang mga lakang sama sa inventory checks ug contingency planning, ilabi na sa mga ospital sa DOH, aron masiguro nga dili malangay ang suplay sa tambal ug medical supplies.
Una nang gipahibalo sa DOH nga padayon nilang ginamonitor ang presyo sa tambal ug mga gamit niini human magpasidaan ang usa ka ekonomista nga posibleng maapektuhan sa inflation ang sektor sa panglawas tungod sa krisis sa Middle East.
Dugang pa ni Domingo, kinahanglan masiguro sa Philippine Health Insurance Corporation kon PhilHealth nga makasabay kini sa gilaum nga pagsaka sa demand sa health services.
Samtang, giawhag niya ang publiko nga sabton ang breakdown o “unbundling” sa bayronon sa mga pribadong ospital, labi na karon nga nagsaka ang presyo tungod sa inflation.
Dugang pa sa opisyal, mas masabtan sa publiko ang pagsaka sa bayranan kung klaro ang detalye niini, ug makatabang usab ang DOH pinaagi sa Zero Balance Billing ug ang PhilHealth pinaagi sa hustong benepisyo.
