BUTUAN CITY – Paningkamutan sa Diocese of Butuan nga sa Nobyembre 26, siento porsiento na silang andam alang sa himuong Gathering for Good Governance kon 3Gs, usa ka prayer rally, sa may City Sports Complex sa Brgy Libertad ning siyudad sa Butuan karong Nobyembre 29.
Sigon ni Rev Fr Herman Licayan, Political Affairs director sa Diocese of Butuan, kabahin lang kini sa nasudnong kalihukan sa simbahan pagpanguna sa Catholic Bishops Conference of the Philippines kon CBCP partikular sa I-Tag White movement.
Sugdan kini pasado alas-dos sa hapon pinaagi sa himuong misa nga sundan sa programa kondiin mamulong ang mga pari ingon man si Bishop Cosme Damian Almadilla ug uban pang mga laymen kon mga tawo sa simbahan.
Gibana-banang mu-abot sa 3 ngadto sa 5-mil ka mga tawong mutambong niini nga gila-umang magsuot og kolor puti nga t-shirt tungod kay mahimo man kining tambungan ni bisan kinsang ka-abag nila sa ilang panawagan nga batukan ang kurapsyon.
Sa pagkakaron, aduna na lang silay gihimong ginagmay nga finishing touches sa ilang preparasyon aron pag-abot sa Nobyembre 26, siento-porsiento na silang andam sa maong kalihukan.
Ang mahitabo matud pa sa maong kalihukan mao ang pagpadayag sa katuyuan niini ilabina nga dili matud pa mahimo nga sa kadako sa nagakahitabo karon sa nasud, wala lang sila’y himuong lakang.
