BUTUAN CITY – Padayon ang pagbantay karon sa Regional Tripartite Wages and Productivity Board kon RTWPB-Caraga sa mga employers aron masuta kung ilang gisunod ang bag-ong daily minimum wage nga gipatuman ning rehiyon sugod niadtong Enero 3 ning tuiga.
Kini human gitas-an ngadto sa 455 pisos matag-adlaw gikan sa 435-pisos ang inadlaw nga suhulan sa mga daily minimum wage earners ning rehiyon samtang gihimo na usab nga 6,500-pisos gikan sa 6-mil pisos ang alang sa mga katabang sa balay.
Giklaro ni Earl Dela Victoria, ang Board Secretary sa maong buhatan nga mi-agi sa saktong proseso ang pagtakda sa minimum wage rates sa rehiyon aron masiguro ang makatarunganong suhulan sa mga empleyado samtang gikonsidera usab ang kaayuhan sa mga employers.
Lakip sa ilang gihimo ang konsultasyon sa nagkada-iyang rehiyon, pagsusi sa kahimtang sa ekonomiya, ug pagtimbang-timbang sa kakapas sa mga negosyo nga muhatag og dugang suhulan.
Samtang gipadayag usab ni Department of Labor and Employment kon DOLE-Caraga regional director Jason Balais, importanteng ipahibalo sa publiko ngadto sa mga hingtungdang ahensya ang bisan unsa mang pagsupak sa mga employers sa gitakdang minimum wage.
Gipadayag niining duna’y mekanismo ang kagamhanan aron sanungon ug tubagon ang reklamo ug gipanigurong ma-atiman ang katungod sa mga trabahante.
