BUTUAN CITY- Nakadawat na ang Department of Migrant Workers-Caraga ubos sa Overseas Filipino Workers kon OFWs Help Desk og 23 ka request for assistance tungod sa tension sa Middle East.
Sumala ni Ritchel Butao, Regional Director sa Department of Migrant Workers, nga ang 23 ka mga request gikan sa manglahi nga aspeto diin ang usa niini request for repatriation ug inquiries usab sa uban kung unsa ang ilang angayan nga buhaton ug ang uban nabalaka gani gihatagan na matud pa nila kini og Psychological First aid.
Sigon pa ni Butao, nga sa maong ihap, 11 ka OFWs ang nagpangayo og repatriation diin 4 gikan sa Kuwait, 1 sa Qatar, 3 sa Saudi Arabia ug 3 sa United Arab Emirates—tungod sa kahadlok nga molala pa ang sitwasyon ug sa presensya sa mga boto-boto sa ilang palibot.
Gibutyag usab niini, nga gi-endorso na kini sa Central Office ug sa Migrant Workers Office aron mahatagan og clearance ug ma-facilitate ang ilang pag-uli sa Pilipinas sa higayon nga tugotan na sila nga makabiyahe.
Dugang pa sa DMW-Caraga Regional Director, ngasa jkasamtangan gi-huwat pa sa Central Office ang pag-release sa clearance gikan sa international airport aron ma-facilitate ang repatriation sa mga OFWs nga nangayo og tabang tungod sa tension sa Middle East.
Giklaro usab niini nga dili basta-basta makuha ang mga OFWs gikan sa ilang employer tungod kini mga kontraktado ug adunay visa nga gihatag sa nasud nga ilang gipuy-an, sama sa Saudi Arabia ug Kuwait nga nagkinahanglan og exit visa.
Gi-emphasize usab ni Butao, nga kinahanglan plastar ang proseso sa pagpauli aron kung gusto pa sa usa ka OFW nga mobalik sa gawas makabalik pa kini ug walay diplomatic issue nga mahitabo tungod sa bilateral agreements nga gi-respeto sa Pilipinas.
Base usab sa report ni DMW Secretary Hans Leo Cacdac, adunay na’y nakauli nga OFWs apan wala pa’y taga-Caraga nga nadawat sa Bancasi Airport, apan gi-andam na ang coordination sa Ang Overseas Workers Welfare Administration ug DMW alang sa paghatag og assistance ugaling adunay moabot. Sa kasamtangan, adunay kinatibuk-ang 1,074 ka OFWs gikan sa rehiyon, diin ang pinakadaghan nga destinasyon mao ang United Arab Emirates, Saudi Arabia, Kuwait, Oman, Jordan, ug pipila sa Israel ug Iran.
