BUTUAN CITY– Padayon ang gihimong koordinasyon sa Department of Migrant Workers kon DMW Central Office ug Regional Office aron masiguro ang hustong giya alang sa mga overseas Filipino workers kon OFWs.
Sa exklusibong pakighinabi kang Ritchel Butao sa DMW Caraga, gibutyag niini nga padayon ang pakigtambayayong sa DMW Caraga ngadto sa mga OFWs nga nag-atubang sa tensyon sa Middle East.
Sumala pa niini, nga ang kasamtangang direktiba ni Department of Migrant Workers Secretary Hans Leo Cacdac mao ang pagtukod og help desk sa tanang regional offices ug sa Butuan, gilunsad na ang OFW Help Desk kansa nag-atiman sa mga reklamo ug panginahanglanon sa mga OFWs, ilabi na sa Middle East.
Gisiguro ni Butao nga padayon ang pagdawat sa mga reklamo ug hangyo pinaagi sa 24/7 hotline samtang abli usab ang opisina sukad pa niadtong Domingo aron modawat og mga request for assistance and concerned sa mga pamilya sa mga OFWs.
Gani, gipadayag niini nga personal kining nakadawat og tawag gikan sa usa ka OFW sa Saudi Arabia diin nangayo og giya alang sa ilang mga panginahanglanon.
Dugang pa ni Butao nga adunay 1,074 ka OFWs gikan sa rehiyon nga anaa sa mga apektadong lugar sa Middle East, kasagaran mga balik-manggagawa o nagbalik-balik na sa ilang mga employer.
Gipasabot usab niini, nga ang datos sa mga first-time OFWs wala pa makuptan sa DMW Caraga tungod kini giproseso pa sa mga ahensya sa Central Office, ug posible nga mas dako pa ang aktuwal nga ihap sa mga OFWs nga anaa sa nasangpit nga rehiyon.
Sa pagkakaron, wala pa’y request alang sa repatriation, apan daghan sa mga pamilya sa OFWs ang nangayo og giya ug impormasyon bahin sa kahimtang sa ilang mga mahal sa kinabuhi.
Gipunting ni Butao nga nagpadayon ang open communication pinaagi sa social media ug hotline, ug gikinahanglan lang nga hatagan og psychosocial intervention ang mga pamilya aron makalikay sa sobra nga kabalaka.
Gikumpirma usab niini, nga kasagaran sa mga OFWs nagpili pa nga magpabilin sa abroad tungod sa ilang responsibilidad sa pamilya ug naglaom nga dili na mosaka sa alert level 3 o 4 ang sitwasyon sa Middle East.
