BUTUAN CITY – Nanawagan kang Department of Public Works and Highways kon DPWH Sec Vince Dizon ang ginang nga si Blezz Amante, residente sa Purok 11, Brgy Afga, Sibagat, Agusan del Sur nga matabangan silang dili maguba ang ilang napundar nga balay tungod lang sa pagpamugos sa district engineer sa DPWH-Agusan del Sur pagpahawa kanila gumikan sa gitukod nga dakong flood control project sa maong lugar kansa dili matud pa mabahaan.
Sa pagdangop ni Blezz Amante sa Bombo Radyo Butuan, gisaysay niini nga sa pito nila ka mga nagpuyo sa bungtod nga bahin sa maong lugar, sila na lang ang wala nagguba sa ilang balay tungod sa kagamay ra sa ibayad kanila nga mu-abot lang sa ₱48,000.00.
Gibutyag pa niini nga gibaharan sila ni Engr Cagmat nga kasuhan higayong dili pa sila makaguba sa ilang balay sulod sa 15 ka mga adlaw sukad sila gipatawag sa barangay niadtong Septembre 18.
Dismayado sila tungod sa kawala’y aksyon sa ilang kapitan nga mudapig unta kanila tungod kay dili matud pa mu-abot sa ilang lugar higayong mu-awas ang tubig sa sapa kung duna’y kusog nga pagbundak sa ulan.
Nanawagan siya kang Department of Public Works and Highways kon DPWH Sec Vince Dizon nga protektahan sila ug ang ilang balay gikan sa kada-ut nga hatud sa dali-daling pagpatuman sa maong proyekto tungod kay dili nila madawat nga gub-on lang kini sa grabe kasayon.
