BUTUAN CITY – Sukad kaniadto hangtud karon, hugot nga gibarugan sa Simbahang Katoliko nga ang kasal, alang lamang sa mga babaye ug mga lalaki base na sa nakalatid sa balaang kasulatan.
Kini ang giklaro ni Fr. Daryl Glenn Tatoy, ang tigpamaba sa Diocese of Butuan kalabot sa gidusong sugyot-baladnon ni Senador Robinhood Padilla alang sa paglegalisar sa same sex union kon same sex marriage kansang detalye, tun-anan pa.
Sa eksklusibong pakighinabi sa Bombo Radyo Butuan, gipadayag ni Fr. Tatoy nga bisan pa man sa ka-usaban karon sa mga trends kon uso diha sa sosyodad, apan ang mga nakalatid sa Bibliya mao ang padayong gisunod sa simbahang Katoliko.
Aminado siyang lahi-lahi ang panghuna-huna sa katawhan kalabot sa nagkada-iyang isyu apil na ang same-sex marriage ilabina kung unsa ka-andam ang nasud alang niini.
Ang importante kanilang mga anaa sa simbahan nga ang baruganan matud pa sa Katoliko dili na ma-utro nga ang kaminyuon alang lamang sa mga lalaki ug babaye.
