BUTUAN CITY – Gimando ni Philippine National Police (PNP) Chief PGen. Jose Melencio Nartatez Jr. ang hinanaling pagpahigayon og imbestigasyon ug pagpangita sa mga suspek nga anaa sa likod sa pagkamatay sa lima ka pulis sa Maguindanao del Sur niadtong Sabado sa gabii, Marso 28.
Sumala sa hepe, hugot nilang gikondena ang maong pag-atake ug gibutyag nga kini usa ka pag-atake batok sa tibuok nasudnong kapulisan.
Sumala pa niini nga dili mohunong ang kapulisan sa pagpangita sa mga responsable sa insidente ug misaad nga atubangon ug manubag sila sa balaod.
Sa pagkakaron, gawas sa lima ka namatay sa engkwentro, adunay tulo usab ka nasamdan sa insidente nga andam suportahan sa PNP aron masiguro ang ilang dali nga pagkaayo.
Nagpahayag usab og pahasubo ang hepe sa mga pamilya nga nabilin sa mga namatay nga pulis ug mipasalig nga kung gikinahanglan ang pagdeploy pa og dugang pwersa gikan sa elite units, buhaton nila aron madakpan ang mga tawo nga anaa sa likod sa engkwentro.
Samtang gisiguro sa hepe nga bisan pa sa nahitabo, magpadayon ang kapulisan sa maisugon nga pagtuman sa ilang mandato nga mohatag og proteksyon ug seguridad sa katawhan ug mga komunidad.
