BUTUAN CITY – Subling isira sunod semana ang Dinagat Islands province sulod sa duha ka semana tungod sa padayong pagsaka sa mga kaso sa COVID-19 sa mga lungsod niini.
Sa pakighinabi sa Bombo Radyo Butuan, gibutyag ni Provincial Information Officer Jeff Crisostomo nga kini subay na sa Executive Order No. 06-01, Series of 2021 nga gipagawas ni Governor Arlene ‘Kaka’ Bag-ao nga mupa-ilalom sa probinsya sa community quarantine agi’g suporta sa nagkadaiyang community quarantine issuances sa mga municipal local government units (MLGUs) sa probinsya.
Tungod niini, dili na usab sila magpasulod og bisan kinsang indibidwal bisan pa sa mga Dinagatnons sugod sa Hunyo 7 hangtud Hunyo 21, gawas lamang sa mga aduna’y medical emergencies, official business ug uban pang mga essential purposes apan mahimo pang makasulod karong Domingo, Hunyo 6.
Lakip sa nakalatid sa kamanduan higayong mo-epekto na kini, ang pagtugot nga makabyahe pa awas sa probinsya basta mutuman lamang ang health ug safety protocols ug duna’yj travel document requirements.
Samtang ang mga membro sa League of Municipalities of the Philippines (LMP) – Dinagat Islands Chapter nga gilangkuban sa 7 ka mga municipal mayors, maghimo og inter-municipal arrangements alang sa mga aktibidad sa katawhan pinaagi sa pag-isyu sa insaktong LMP Resolution ug ang posibleng pagmontar og mga border check points.
Gibutyag ni Crissostomo nga gipagawas ni Governor Bag-ao ang maong kamanduan aron makaginhawa ang ilang probinsya human puno-puno na usab ang ilang mga isolation facilities.
