BUTUAN CITY – Giila ang Probinsya sa Dinagat Islands isip usa sa mga nang-unang lokal nga destinasyon sa Pilipinas sa gipahigayon nga 32nd Philippine Travel Agencies Association Inc. kon PTAA Travel and Tour Expo 2025 sa Pasay City, Manila.
Gisugdan ang maong aktibidad niadtong Biernes, Pebrero 7 taman ning adlawa. Mismong ang Tourism Promotions Board (TPB) ubos sa ilang kampanya nga “The Philippines” ang nag-ila sa Dinagat island isip nag-unang destinasyon sa torismo.
Nalinya ang probinsya sa mga maanindot ug sikat nga mga destinasyon sa Pilipinas sama sa Batanes, Boracay, Albay, ug uban pa.
Usa lamang matud pa kini sa pamatuod nga nag-una usab ang maong isla highlight tourist destination sa Pilipinas.
Kahinumdumang ningbisita ang Tourism Promotions Board sa probinsya niadtong Nobyembre 2024 isip kabahin sa ilang Domestic Tourism Development Invitational Program.
Subay niini, personal usab nga gitunol sa Gobernador sa Probinsya nga si Hon. Nilo “Remedy” Demerey Jr., ug sa asawa niining si Marichu M. Demerey, ang token sa pasalamat ngadto kang Ms. Ronileen Bauto ug Mr. Kyle Robles sa Tourism Promotions Board isip pasidungog sa ilang dakong kontribusyon sa pagpasikat ug pag-ila sa potensyal sa turismo sa probinsya ngadto sa tibuok kalibutan.
