BUTUAN CITY – Epektibo na sugod karong adlawa Hunyo 7 hangtud Hunyo 21, ang pagsira sa Dinagat Islands province aron mahunong na ang nagkadaghang kaso sa COVID-9 sa maong probinsya.
Tungod niini, dili na makasulod ang mga indibidwal bisan ang mga Dinagatnon gawas lamang sa mga aduna’y medical emergencies, official business ug uban pang mga essential purposes.
Sa eksklusibong pakighinabi sa Bombo Radyo Butuan, gipadayag ni Provincial Information Officer Jeff Crisostomo nga subling isira sulod sa duha ka semana ang maong probinsya subay na usab sa Executive Order No. 06-01, Series of 2021 nga gipagawas ni Governor Arlene ‘Kaka’ Bag-ao agi’g suporta sa nagkada-iyang community quarantine issuances sa mga municipal local government units (MLGUs) sa ilang probinsya.
Lakip sa nakalatid sa kamanduan ang pagtugot nga makabyahe pagawas sa probinsya basta mutuman lamang sa health ug safety protocols ug duna’y travel document requirements.
Samtang ang mga membro sa League of Municipalities of the Philippines (LMP) – Dinagat Islands Chapter nga gilangkuban sa 7 ka mga municipal mayors, maghimo og inter-municipal arrangements alang sa mga aktibidad sa katawhan pinaagi sa pag-isyu sa insaktong LMP Resolution ug ang posibleng pagmontar og mga border check points.
Gibutyag ni Crisostomo nga gipagawas ni Governor Bag-ao ang maong kamanduan aron makaginhawa ang ilang probinsya human puno-puno na usab ang ilang mga isolation facilities.
