BUTUAN CITY – Nanguna ang mga tag-as nga opisyal sa Department of the Interior and Local Government kon DILG sa pagpahigayong ug simultaneous nga Constitutional Reform (CORE) Roadshow nga kasamtangan karon gipahigayon ning dakbayan sa Butuan. Nasayran nga naglibot suroy karon sa intero nasud ang mga taas nga opisyal sa DILG alang sa ilang constitutional reform kon Core campaign sa giduso ni Pangulong Rodrigo Duterte nga Federalism.
Sa ekslusibong pakighinabi sa Bombo Radyo Butuan kang DILG Usec. Gerardo Salapantan, gikabutyag niini nga nag-una nilang tumong ang pagpahigayon og information drive kini base na sa gilagdaan ni pangulong Duterte nga MC 52, nga naghatag ug kagahuman sa DILG sa pagpatuman sa nahisgutang kampanya. Aminado si Usec. Salapantan nga kadaghanan sa mga Pinoy ang nibati ug kahadlok sa gihan-ay karong Pederalismo, taliwa sa pagsalig sa publiko ngadto kang Pangulong Duterte.
Resulta matod pa kini sa kakulang sa pagpasabot sa katibuk-an ug sa mamahimong epekto sa sugyot balaodnon nga hinungdan sa pagduha duha sa katawhan. Busa malaumon ang opisyal nga pinaagi sa ilang ilusad nga kampanya mas mapasabot ang publiko sa pipila ka mga kausaban ilawom sa Federal form of government.
Sa pikas bahin hugot usab nga giklaro ni Atty. Donna Manlangit nga ang pagpanday sa pederalismo wala nagpasabot nga failure ang nagtunhay karong 1987 constitution. Kini tungod namugna ang maong konstistusyon pinaagi sa katuyuan niining mapalig-on ang demokrasya sa nasud batok sa napatuman kaniadto nga dektatorya.
Tungod sa mga nakita karong problema, hinungdan nga dunay gihan-ay nga sugyot balaodnon aron tubagon ug sulbaron kini ug pinaagi sa pakighinabi ug pagpasabot nanghinaot ang opisyal nga masayran sa katawhan ang mga gikinahanglan kausaban sa nasudnong balaod.Sa nagpadayong road show, naglusad karong adlawa ang DILG ug convention sa Caraga State University nga nahimutang sa Brgy. Ampayon, Butuan City diin mukabat sa dul-an 3 mil ang mga nitambong.
