BUTUAN CITY-Padayon ang pagpatuman og mga lakang sa Department of the Interior & Local Government (DILG) sa Surigao del Sur aron malikayan nga makasulod ang COVID-19 Delta variant sa lalawigan.
Gibutyag sa maong buhatan nga dunay nagkadaiyang estratehiya ug inisyatibong gihimo karun sa mga local government units kon LGUs bisan ang mga otoridad tungod sa padayon nga hulga sa COVID-19.
Lakip na niini ang aktibo ug agresibong case detection ingun man contact tracing, pagpatukod og mga Temporary Treatment and Monitoring Facilities (TTMF) ug quarantine facilities; padayon nga implementasyon sa regional border checkpoints ingon man pagpatuman sa localized granular lockdowns kung gikinahanglan nga himoon sa matag lokal nga gobyerno.
Apan gi-klaro sa DILG Surigao del Sur nga importante gihapon ang pagpabakauna batok sa COVID-19 apil ang pagsunod sa minimum health protocols ug ang ilang gihimo nga  inspection sa mga establisamiento alang sa adunay safety seal certification aron masigurong luwas ang katawhan sa maong lalawigan.
