BUTUAN CITY – Gipangunahan ni Department of Interior and Local Government Secretary Benhur Abalos ang paghatag og assistance ngadto sa 199 ka mga kanhi rebeldeng New People’s Army ug mga sakop sa Milisya ng Bayan sa entiro rehiyon sa Caraga.
Sa eksklusibong pakighinabi sa Bombo Radyo Butuan, gipadayag ni PMajor Jennifer Ometer, tigpamaba sa Police Regional Office kon PRO-13, gipahigayon ang maong kalihukan sa Prosperidad, Agusan del Sur.
Ang nasangpit nga ihap, aprubado sa ilang sentrong buhatan sa ilang pag-apply sa Enhanced Comprehensive Local Integration Program kon ECLIP human nanurender.
Aminado si Major Ometer nga ubay-ubay sa mga nanurender na nga mga rebeldeng NPA ang nag-apply niini apan 199 pa lang ang gi-aprubahan rason nga sila ang unang nahatagan sa nasangpit nga financial ug livelihood assistance.
Mapasalamaton matud pa ang nasangpit nga mga benepisyaryo sa assistance sa gobyerno ilabina nga gikan sa ilang pagsurender hangtud karon, wala sila pasagdi sa ilang panginahanglanon samtang naghulat sa ilang assistance.
Gawas pa, giplastar usab sila sa gitawag nga halfway houses ug uban pang bakanteng pasilidad diin luwas ang ilang pagpuyo uban sa ilang pamilya.
