BUTUAN CITY – Gikalipay ni kanhi Iloilo City Mayor Jed Patrick Mabilog ang pagpa-uli na niya sa hingpit, sa lugar nga iyang gibiyaan pito ka tuig na ang nakalabay human mikagiw sa Estados Unidos dihang gi-apil sa narco-list ni kanhi Pangulong Rodrigo Duterte. Sa iyang pag-abot sa Iloilo International Airport, mideretso ang mayor sa St. Anne Parish sa Brgy. Molo diin mitambong siya sa balaang misa ka-uban ang iyang pamilya ug mga supporters nga init nga misugat kaniya.
Sa eksklusibong pakighinabi sa Bombo Radyo Philippines, gipadayag niini ang tumang kalipay nga gibuhi siya sa Kahitas-an aron isaysay ang tinuod matud pa nga istorya kalabot sa maong alegasyon. Wala matud pa siya’y gikabalak-an sa iyang siguridad human sa iyang pagbulgar sa hearing sa quad committee kagahapon tungod kay mas dako matud pa ang iyang pagsalig sa taas kaysa kahadlok alang sa iyang kinabuhi.
Samtang bisan pa man sa paglakip kaniya sa narco-list sa kanhi pangulo, nanghinaut ang kanhi mayor nga mumaayo pa ang panglawas niini dungan sa panghinaut nga hatagan sila og higayon na subling magka-istorya.
Kalabot usab sa pagkadamay karon sa kanhi pangulo sa daghang mga isyu, igo lang gibutyag ni Mabilog nga pasagdan na nga mahatag ang hustisya ngadto sa mga nangita niini.
