BUTUAN CITY – Gidamay na sa duha ka mga resources persons sa House Quad Committee nga gipangunahan ni Surigao del Norte Congressman Robert ‘Ace’ Barbers si kanhi Pangulong Rodrigo Duterte nga duna matud pa’y kalabutan sa pagpapatay sa tulo ka mga Chinese drug lords nga nahukman ug gibilanggo sa Davao Penal Colony kon DAPECOL nga karon mao na ang Davao Prison and Penal Farm.
Naila ang mga biktimang Intsik nga sila Chu Kin Tung, Li Lan Yan ug Wong Mien Pin kinsa ilang gipangluba base na usab sa kamanduan matud pa ni Davao Prison officer Superintendent Gerardo Padilla nga patyon sila bugti sa ganting usa ka milyon ka pisos kada-ulo sa mga biktima ug sa ilang kagawasan.
Gihimo ang imbestigasyon aron ma-usa ra pagtuki ang mga isyu kalabot sa extrajudicial killings, war on drugs campaign sa administrasyong Duterte ug ang mga criminal activities nga gilambigitan sa Philippine Offshore Gaming Operators.
Sa duha ka mga resource persons nga sila Leopoldo Tan ug Fernando Magdadaro nga parehong taga-Davao ug napriso na karon sa Baguio City tungod sa maong kremin, gisaysay ni Tan nga pila ka adlaw human sa kremin ug dihang padulong na sila sa Investigation Section, duna’y naka-istorya si Padilla sa cellphone nga susama matud pa sa tingog sa kanhi pangulo.
Misamot pa ang iyang pagduda dihang misulti si Padilla sa ka-uban niini nga gitimbaya siya sa pangulo tungod sa malampusong gitahas kaniya.
