BUTUAN CITY – Gikumpirma ni Vice President Sara Duterte nga nagboluntaryo ang iyang amahan nga si kanhi Pangulo Rodrigo Duterte nga mahimong usa sa iyang mga abogado sa gi-atubang niyang mga kaso apil na sa impeachment complaints.
Nasayrang nag-atubang og tulo ka impeachment complaints ang bise presidente nga gipasaka sa pipila ka pari sa simbahang Katoliko, religious group, mga abogado ug mga progresibong grupo.
Sumala ni Vice President Sara, nagpadayag nabalaka ang iyang amahan ug nagpangutana sa estado sa iyang gi-atubang nga mga impeachment complaints. Sumala ni VP Sara, naghulat na lang sila sa pormal nga articles of impeachment gikan sa House of Representatives dayong padayag nga kampante siyang wala siya’y gilapas nga balaod.
Magka-uban ang amahan og anak nga Duterte sa tinuig nga pagpanghatag og pinaskuhan sa iyang pamilya nga gihimo sa Bangkal, Davao City, kagahapon sa hapon. Sa pamahayag usab sa kanhi presidente, hugot nang gisuportahan ang iyang anak pagka-presidente.
