BUTUAN CITY – Andam si kanhi Pangulong Rodrigo Duterte nga mupirma og waiver aron makita ang sulod sa iyang mga bank accounts apan ubos sa kondisyon nga mupirma usab niini ang tanang tawo nga iyang itudlo apil na matud pa ang mga kongresistang iyang ka-atbang kagahapon sa pagdungog sa House Quad Committee.
Iyang gibutyag nga ang mga tawong gipatawag sa pagdungog nga nagpaka-aron ingnong mga biktima, gibalewala lamang niya tungod kay anad na matud pa niini sa ingon niini nga diskarte sa mga magbabalaud.
Aron makita matud pa sa tanang katawhan sa tibuok Pilipinas, apil nga mupirma og waiver ang tanang gusto usab niyang papirmahon niini.
Dugang pa sa kanhi pangulo, nga angayang sabton sa mga magbabalaud ang iyang gipakitang taras atol sa pangdungog tungod kay mao kana ang iyang tinuod nga taras ilabina ang pagpamalikas nga naklaro sa tanan sa iyang pagtambong sa mi-aging Senate hearing.
