BUTUAN CITY – Gireklamo sa pipila ka mga residenteng duol sa Chinese cemetery sa Brgy Bancasi ning siyudad sa Butuan ang dugay na nilang gi-antus nga tubig-baha nga mudagayday sa ilang kalsada matag-bundak sa kusog nga ulan.
Sigon ni Jannah Estorba, gikan ang maong mga tubig sa abli na nga mga pantyon nga mudagayday padulong sa kalsada kansa naghatag og dakong hulga sa ilang panglawas tungod sa kahugaw niini.
Saysay niini, tungod kay taas-taas ang mentiryo sa ilang lugar, rason nga adto gayod kini padulong sa ilang kalsada matag-uwan.
Samtang gipadayag usab ni Joseph Inojo nga hasol kaayo alang kanila ang maong tubig-baha ilabina kadtong ma-abtan og lapad-lapad nga tubig.
Saysay pa niini sa Bombo Radyo, mura matud pa og duna’y sapa sa ibabaw sa ilang lugar diin nahimutang ang minteryo tungod sa wala’y hunong nga pagdagayday sa tubig-baha.
