Patay ang usa ka habal-habal driver human kini malatayan sa usa ka Prime Mover Truck, samtang naangol usab ang pasahero niini. Nahitabo ang maong disgrasya bandang alas 11 sa buntag, Septyembre 27, 2025 sa Km. 8, Tibungco, Daang Maharlika Highway sa dakbayan sa Davao.
Nalambigit sa aksidente ang usa ka Mitsukoshi motorcycle nga gimanehoan sa usa ka alyas Ivan, 33-anyos, nga taga Purok 3, Tibungco; ug Prime Mover truck nga gidrayban ni alyas Jessie, 37-anyos nga taga-Km. 11, Sasa dakbayan sa Davao.
Sa pikas bahin, angkas usab sa motor ang 24-anyos nga pasahero nga si alyas Angel kansa taga-Tibungco usab.
Base sa inisyal nga imbistegasyon sa kapulisan, parehong nagsubay sa dalan ang duha ka behikulo diin ang motor anaa sa outer lane ug anaa usab sa inner lane ang truck.
Apan pag-abot sa lugar, gikatahong nag-abot ang duha ka sakyanan ug nabanggaan sa trak ang likod nga bahin sa motor nga miresulta sa ngilngig nga aksidente.
Girespondehan kini sa mga paramedics gikan sa TRAPMOC Ilang Rescuer, apan wala nay pulso ang naligsan dihang ilang naabtan.
Anaa na sa kustudiya sa kapulisan ang driver sa truck alang sa tukmang disposasyon.
