BOMBO BUTUAN – Subling gireklamo sa mga residente sa Los Angeles ning dakbayan sa Butuan ang usa ka poultry farm, human nga ning dugok ang di mabang-bang nga langaw sa ilahang mga panimalay.
Sumala ni Allan Peregrino, residente sa P-5 Brgy. Los Angeles nga subli na usab matud pa silang gidugok og langaw karon nga ting-harvest na sa nasangpit nga farm. Saysay niini, nga matag adlaw matud pang mang-spray ang maong poltrihan, apan mamalik ra usab ang mga langaw human nila og pang-spray.
Subay sa reklamante, lisod matud pa alang sa iyahang kabahinan ang maong infestation ilabi pa kay dunay cancer ang iyahang asawa. Gihuptan usab sa nasangpit nga reklamante ang pamahayag kaniadtu sa City Environment and Natural Resources Office nga ipasira na gayud sa pangamhanan ugaling duna na usay modugok nga langaw sa maong lugar tungod sa ilahang farm.
Ang pamahayag ni Allan Peregrino, residente sa P-5 Brgy. Los Angeles. Subay niini, nanawagan nalang ang maong maong residente sa bag-ong Mayor ning dakbayan nga si Mayor Law Fortun nga tabangan sila sa ilahang problema sa langaw.
Kahinumdumang temporaryong gipahunong sa lokal nga kagamhanan ning siyudad sa Butuan ang operasyon sa Sentro poultry farm sa maong Barangay niadtung Hulyo 2023 isip tubag sa petisyong gipasaka sa mga residente tungod sa dili masingo nga baho sa ilang waste materials ug sa sobra kadaghan sa mga langaw nga nangdagsa sa sulod ug gawas sa kabalayan.
