BUTUAN CITY – Gibutyag sa defense lawyer ni kanhi Pangulong Rodrigo Duterte na si Atty Nicholas Kaufman ngadto sa International Criminal Court nga dili na kini makadumdom sa ubang mga panghitabo, pamilya, lugar, ug uban pa.
Gipadayag kini ni Kaufman dihang iyang gihangyo nga i-adjourn na indefinitely ang tanang mga legal proceedings batuk kaniya. Base sa public redacted version sa “Defence Request for an Indefinite Adjournment” nga gipagawas sa ICC kagahapong adlawa, gibutyag ni Kaufman nga wala nay kapasidad si Duterte ilabina ang iyang cognitive skills nga maoy kinahanglan alang sa iyang pagdepensa. Dugang ni Kaufman, dili na gani niini maproseso ang rason sa iyang pagkadetene sa ICC ug pagdumdom sa ubang mga panghitabo sa iyang kinabuhi.
Una nang gi-postpone sa ICC nag pagdungog sa confirmation of charges karon untang Septembre 23 human nga gipamugos sa kampo niining unfit kini alang sa maong pagtaral.
Kasamtangang anaa sa Scheveningen Prison sa The Hague si Duterte alang sa pag atubang sa alegasyong crimes against humanity. Gisupak ni Judge María del Socorro Flores Liera ang desisyon nila Presiding Judge Iulia Motoc ug Judge Reine Alapini-Gansou.
