BUTUAN CITY – Nasuta sa Philippine Anti-Corruption Czar kon PACC nga klarong paglapas sa Department of Public Works and Highways kon DPWH Standard Specifications ang substandard kaayong Dankias–Danapa Road concreting project. Sigon ni PACC Chairman Doc. Louie Ceniza, nakalatid sa maong blue book ang pagbutang og saktong compaction, slope protection, ingon man proper drainage alang sa mga road projects.
Nasayrang aktwal nga nasaksihan sa mga sakop sa PACC ang pagkahugmak sa maong concreting project gikan sa Purok 3 ngadto sa Purok 7, Barangay Dankias, ning siyudad sa Butuan, usa ka buwan lang human kini nakompleto.
Ang balor ₱6.8 million nga proyekto, gipatuman sa Department of Public Works and Highways kon DPWH Butuan City District Engineering Office ug gi-award matud pa, ngadto sa ROIM Builders & Construction Supply, kansa kabahin sa Fiscal Year 2023 infrastructure program.
Tungod niini, girekomenda sa PACC ang pagmando sa contractor nga i-repair kini nga wala na’y gastuhon pa ang gobyerno, pahamtangan og administrative sanctions ug i-blacklist ang contractor ug imbestigahan ang mga opisyales sa DPWH Butuan District Engineering Office tungod sa posibleng pagpasagad o kaha panagkunsabo.
