BUTUAN CITY- Gipanghimatud-an sa Bangon Sambayanan ang desisyon sa Korte Suprema nga nagpakita sa lig-on nga demokrasya ug pagpanalipod batok sa abuso sa gahum.
Sumala ni Jeffrey “Ka Eric” Celiz, Secretary General sa Bangon Sambayanan, nga positibo ang epekto sa desisyon sa Korte Suprema nga nagpinal sa pag-ingon nga adunay deperensya ang mga artikulo sa impeachment nga gipasa sa House of Representatives padulong sa Senado niadtong Pebrero 5, 2025. Sigon ni Celiz, nga kini nagpalig-on sa demokrasya ug nagpakita nga adunay institusyon nga makasukol sa abuso sa gahum.
Gipanghimatuud sa Korte Suprema nga dili mahimong abusohon ang proseso sa impeachment bisan pa adunay numero, pondo, ug gahom. Gibutyag usab ni Celiz, nga ang unang impeachment attempt sa panahon ni kanhi House Speaker Martin Romualdez, kansa supportado ni President Ferdinand Marcos Jr., naglakip sa mas dako nga kantidad nga P209 bilyon alang sa ayuda ug mga proyekto sa imprastraktura, base sa pagbunyag ni Congressman Toby Tiangco, inay gigamit aron ipangsuhol.
Dugang pa ni Ka Eric, nga bisan paman nga wala gipangayo sa rolling, klaro na matud pang sayop ang proseso tungod ulahi na gipagawas ni Congressman Toby Tiangco ang ebidensya sa natigayong pagpanuhol gamit ang pondo sa gobyerno nga unta alang sa mga proyekto ug sa kaayuhan sa katawhan, inay nahimong instrumento sa political demolition attacks batok kang Vice Presidente Sara Duterte.
Sumala ni Celiz, napapanahon ang desisyon sa Korte Suprema ilabi na nga adunay mga bag-ong lihok nga daw impeachment batok ni Presidente Marcos Jr. ug usab ang plano sa pagbalik sa reklamo batok sa Bise Presidente. Giklaro usab sa Korte Suprema nga mahimo ang impeachment, apan kinahanglan nga sundon ang tukmang proseso ug balaod, walay shortcut ug dili limbongon, diin kini unconstitutional ug abuso sa gahum nga dili angay i-tolerate.
