BUTUAN CITY – Gikumpirma ni Engr Jose Ceasar Radaza, district engineer sa Department of Public Works and Highways kon DPWH Butuan City District Engineering Office nga gimanduan na sila sa ilang regional director pagsubmite sa ilang courtesy resignation.
Kini human gipadayag sa paglingkod ni bag-ong DPWH Sec Vince Dizon nga una niyang himuon ang pagpa-resign sa tanang mga opisyales sa ahensya hangtud na ngadto sa mga district engineers.
May kalabutan gihapon kini sa nagpadayong paglimpyo sa ahensya tungod sa halapad nga kurapsyon nga hatud sa gipangbulsang bilyunes pisos nga pundo sa mga flood control projects.
Sigon ni Radaza, sa pagkutlo niini nga balita, wala pa sila’y nadawat nga memorandum gikan kang Sec Dizon kalabot sa maong katuyuan apan nagsubmite na matud pa siya sa iyang courtesy resignation kagahapon pa lang.
Gi-consolidate na matud pa kini sa ilang regional office aron ma-usa ra og submit gikan sa nagkada-iyang district offices sa Caraga Region, higayong muyamar na niini ang ilang sentrong buhatan.
Wala matud pa’y problema kang Engr Radaza ang pag-resign isip tabang usab sa ahensya ilabina nga dako pa ang trabahuon sa bag-ong kalihim aron lang malimpyuhan ang ilang ahensya gikan sa daut niini nga imahe.
Giklaro pa niini nga ang gipangayong courtesy resignation, sa ila lang posisyon ug dili sa pagserbisyo sa gobyerno.
