BUTUAN CITY – Misikat karon og maayo sa Japan ang 20-anyos nga artist nga si Momotsuki tugod kay iyang gi-blend ang iyang gugma sa pag-garden ingon man ang iyang pantasya ngadto sa usa ka pinasahing porma sa art nga gitawag niya og “fairy dresses“ kon sapot sa mga engkantada.
Kung ganahan ka usab og mga fairy dresses, ang pinakahaum nga gamiton niini mao ang mga buwak, apan nagkinahanglan kini og igong abilidad ug imahinasyon aron mahimo kining mga functional garments kon masuot gayod nga mga sinina ug si Momotsuki, duna niini nga mga abilidad.
Usa ka passionate gardener si Momotsuki sulod na sa 14 ka mga tuig ug kini ang iyang gigamit uban sa iyang daghang maayong mga ideya alang sa paghimo og mga sapot alang sa mga fairies.
Apil sa mga buwak nga iyang gigamit sa paghimo og mga nindot kaayong sinina sa mga engkantada ang pansies, morning glories, roses ingon man carnations nga kung suuton sa fairy, siguradong ganahan sila niini.
Kadaghanan sa mga buwak nga gigamit ni Momotsuki naggikan sa iyang kaugalingong garden, ug usahay mamalit usab siya ug mamunit sa mga nangatagak na nga buwak.
Sigon sa Fairy Dress website, nakahimo si Momotsuki sa iyang una nga fairy dress niadtong Abril 2021 dihang naglakaw-lakaw siya sa iyang garden samtang padayong nag-recover gikan sa depression.
Nakakita siya og usa ka buwak nga dali niyang gipunit ug gihimong sinina tungod kay mao kini ang unang na-abot sa iyang huna-huna kondiin ang resulta…iya mismong gikakurat ug labaw na sa nakakita niini dihang iya kining gi-post sa iyang social media account hangtud nga nag-viral na kini.
