BUTUAN CITY – Nagpagawas na ang Department of Trade and Industry (DTI) og tamdanan alang sa mga presyo sa mga “back to school items” karong nagkaduon na ang abri sa klase.
Sumala sa maong ahensya nga ang “Gabay sa Pamimili ng School Supplies”, mamahimo matud pang giya sa publiko alang sa paliton nilang mga items sama sa Notebook nga nagdula sa P11.80 ngadto sa P52.00; Grades 1-4 pad paper nga anaa sa P9.50 ngadto sa P61.00; Lapis sa P11.00 ngadto sa P33.00; Ballpens, kansa anaa sa P3.00 ngadto sa P33.00; Crayons nga dunay walo ka mga kolor, P12.00 (regular) ug P65.00 alang sa jumbo; Tahal sa P15.00 ngadto sa P69.00; ingon man ang Ruler nga anaa sa P16.00 ngadto sa P29.00; ug Erasers nga tag P4.50 ngadto sa P20.00.
Gipahimangnuan usab sa Department of Trade and Industry (DTI) ang publiko nga kinahanglan ang paliton, dunay address sa manufacturer o kaha sa importer, dugang niini nga kinahanglan makita usab sa notebook ang numero kon pila ka palid anfg papel nga anaa sa sulod niini.
Gipagawas ang maong price guide kagahapong adlawa samtang gi sugdan na usab sa Department of Education ang enrollment sa mga estudyante sa pampublikong tunghaan sa school year 2024-2025.
