BUTUAN CITY – Gipaneguro sa Department of Agriculture kon DA nga igo ang suplay sa agricultural products sa nasud sa sunod nga 90 ka adlaw o hangtud sa buwan sa Hunyo sa kasamtangang tuig.
Kini bisan paman sa nagpadayon nga tensiyon sa Middle East ug pagtaas sa presyo sa mga produktong petrolyo.
Sumala ni Agriculture Secretary Francisco Laurel Jr., kasamtangang walay isyu nga nakaapekto sa mga nag-unang palaliton lakip na ang bugas.
Sigon usab sa kalihim nga gilaumang magpabiling lig-on ang suplay bisan hangtud sa buwan sa Hulyo.
Pasabot sa DA chief nga nag-unang hinungdan kay daghang stocks sa bugas sa National Food Authority (NFA) nga anaa halos katunga sa tonelada sa bugas.
Panahon usab karun sa peak harvest hangtud sa buwan sa Mayo.
Samtang pag-abot sa uban pang agricultural products, nagpabiling lig-on ang supply level lakip na ang mais, asukal ug sibuyas.
Kini ang rason nga nagpadayon ang produksiyon sa gulay tungod sa kasamtangang planting ug harvesting season samtang sa suplay usab sa karneng baboy, nagpabiling igo pareho sa lokal nga produksiyon ug imported stocks nga anaa sa cold storage.
