BUTUAN CITY – Personal nga gibisita ni Department of Environment and Natural Resources kon DENR Secretary Roy Cimatu ang mga minahan sa Caraga Region.
Sigon ni Eric Gallego, Regional Information Officer sa DENR-Caraga, miabot si sec. Cimatu kaganina sakay ang chopper ug mibisita sa mga minahan sama nalang sa Taganito Mining sa Claver, Surigao del Norte aron personal nga makita ang rehabilitation site, mining operation ug processing site sa minahan.
Gibutyag ni Gallego nga napabilib matud pa ang DENR Secretary sa Taganito Mining human niini nasayran nga dunay kaugalingong processing plant sa sulod, nga angayang sundugon sa ubang mga minahan sa rehiyon.
Ang nasangpit nga pagbisita sa opisyal, kabahin matud pa sa mandu ni Pangulong Rodrigo Duterte nga monitoron ang minahan sa Caraga ug makita ang aktuwal nga sitwasyun ilabina ang pagka-opaw na sa bukid nga gi-operitan sa mga mining companies.
Sa gihimung meeting, nasabutan nga angayang e-rehabilitate sa mga minahan ang ilang gi-operitan nga lugar.
Nagpahigayon usab kini ug panagpulong sa mga empleyado aron matuki ang mga isyu sa pagdumala sa ahensiya.
