BUTUAN CITY – Bisan og anaa lang sa below alert threshold level ang kaso sa dengue sa Surigao del Norte mas gipili gihapon sa probinsyal nga panggamhanan ang pagdeklara sa dengue outbreak.
Kini base na sa Executive Order # 19-20 Series of 2019 nga gipakanaug ni Gov. Sol Matugas gumikan sa padayong pagtaas sa kaso sa dengue sa maong probinsya.
Sa datus nga gipagawas sa Department of Health kon DOH, ang lima ka mga barangay sa Surigao City nga adunay pinakataas ug kaso sa dengue mao ang Brgy. San Juan, Washington, Taft, Luna ug Canlalipa.
Tumong sa deklarasyon nga mas mapalig-on ang “awareness” sa katawhan pagbatok sa maong sakit. Kini aron masabtan sa katawhan ang pagsunod sa 4S kon Search and destroy mosquito breeding places, Secure self-protection, Seek early consultation ug Support fogging/ spraying only in hotspot areas isip pinaka-epektibong paagi aron makalikay sa makamatay nga sakit nga dala sa lamok.
