BUTUAN CITY- Mingsaka na sa 51 ang patay sa pagka-unlod sa MV Trisha Kirsten 3 human makarekober sa Philippine Coast Guard kon PCG ang laing 6 pa ka patay’ng lawas, sumala ni Capt. Noemie Cayabyab.
Lima ang nakit-an sa first-deck economy area, ug usa sa accommodation area sa barko.
Ang mga patay’ng lawas gibalhin na sa Zamboanga City Port alang sa identification.
Padayon ang search and dive operations taliwala sa kusog nga balod ug ang dili lig-on nga posisyon sa barko, kansa nakasandig lang sa kilid. Sa kasamtangan 316 na ang nakaluwas, samtang wala pay kasiguraduhan ang ihap sa mga nangawala.
Ang remotely operated vehicle kon ROV nga mingtabang sa pagmarka sa barko, kasamtangang gi-repair.
Gi-imbestigahan usab sa PCG ang posibilidad nga buslot sa barko isip hinungdan sa pagka-unlod, samtang ang kinatibuk-ang fleet sa Aleson Shipping gipahunong sa Department of Transportation kon DOTr samtang nagpadayon ang imbestigasyon.
