BUTUAN CITY –Ningkabat na sa kinatibuk-ang 1,002 ka mga indibidwal ang nangamatay tungod sa magnitude 7.7 nga linog nga miigo sa Myanmar ug Bangkok, Thailand kagahapong adlawa. Subay niini, anaa na usab sa 2,376 ka mga indibidwal ang nangaangol.
Kadaghanan sa mga natala nga nangamatay ang gikan sa Mandalay, ang ikaduhang pinaka dako nga siyudad sa Myanmar ug ang pinaka duol sa epicenter sa linog.
Sa kasamtangan, padayon pa ang mga rescue workers sa pagpangita og mga survivors sa mga nahugnong dakbalay sa nasangpit nga dapit. Saysay pa sa usa ka rescue team nga ila lamang gikubkob ang uban sa mga narescue nilang indibidwal sa nahugno nga mga dakbalay sa Mandalay gamit lang ang ilang mga kamot.
Nagpadayon usab ang rescue operations sa usa ka under-construction high-rise building sa Bangkok, Thailand human kini nahugno, diin anaa pa sa 100 ka mga construction workers ang nagpabiling unaccounted samtang unom na usab ang gikatahong patay.
Kalabot niini, ning apelar na ang Junta Government sa Myanmar og tabang gikan sa mga internasyonal nga organisasyon ug sa ubang mga nasod.
