BUTUAN CITY – Ningsaka na sa Onse ang namatay tungod sa pagdahili sa yuta sa Purok 19, Pagasa, Barangay Mt. Diwata Monkayo, Davao de Oro, kini human nakita na sa mga otoridad ang mga patayng lawas sa tanang biktima sa nasangpit nga landslide.
Kini human nabagatan na ang patayng lawas ni Rommel Gumatin, 45-anyos, kagahapong adlawa bandang ala una sa hapon, duha ka adlaw human kini natabunan sa yuta uban sa unom niini ka myembro sa panimalay. Si Rommel, kansa katapusang nakita sa tanang mga nangamatay, maoy amahan sa lima ka mga batang biktima nga nailang sila si Cristelle Gumatin, 10 anyos; Hannah Gumatin, 9 anyos; Ailee Gumatin, 8 anyos; Dysna, 3 anyos; ingon man si Rommel “Arjay” Jr., nga usa pa lamang ka tuig.
Patay usab ang asawa niini nga si Catherine Gumatin, 27-anyos. Lakip sa mga biktima ang lain pang upat nga kauban sa pamilya sa dihang nahitabo ang maong landslide, kansa nailang sila si Ritchell Reboldad, 35 anyos; Agnes Bitoon, 44 anyos; Elvera Saldua, 35 anyos; ingon man si Marjomie Nenaria, 33 anyos.
Kahibaloan nga nagtapok ang nasangpit nga mga biktima sa balay nila Rommel alang sa usa ka prayer gathering. Alayon niini, bugtong usa ka batang masoso pa lamang ang naluwas gikan sa maong trahidya tungod kay giitsa man kini sa gawas nga bahin sa balay sa usa sa mga biktima.
