BUTUAN CITY – Luwas nga na-rescue ang mga sakay ug mga crews sa usa ka de-pasaheru-ang motor banca human nabuslot ang katig niini samtang naglawig sa kadagatan sa Surigao Del Norte kagahapong adlawa.
Sumala pa, gikan sa Surigao City ug padulong na unta sa lungsod sa Del Carmen, Siargao Islands sa Surigao del Norte ang MB Phillip Mark-2 dihang nabuslot ang tuong bahin nga katig niini human nadasmag sa naglutaw nga kahoy sa dagat hinungdan nga nagdesisyon ang kapitan sa maong motor banca nga muliko sa Bucas Grande Island, diin didto gi-rescue ang 19 ka mga pasahero ug 5 ka crews.
Gilayon ra usab nga gi-transport ang mga pasahero ngadto sa ilang padulngan.
Una nang gikansela kagahapon sa Philippine Coast Guard kon PCG-Surigao del Norte ang biyahe sa tanang mga sakyanang pandagat nga mitimbang og 20-gross tonnage pa-ubos tungod sa bagyong Auring.
