BUTUAN CITY – Giklaro ni Senate President Pro Tempore Panfilo ‘Ping’ Lacson ang viral picture niya ka-uban ang magti-ayong Discaya nga gi-share ni Cong. Kiko Barzaga uban sa caption nga namalihog nga imbestigahan ang private meeting ni Lacson sa magti-ayon.
Gika-ingon nga kuha ang maong hulagway sa katapusang semana niadtong Abril ning tuiga, dihang patapos na ang 90-day campaign period alang sa 2025 midterm elections.
Sigon ni Lacson, usa matud pa ka campaign supporter gikan sa Davao City nga si Fred Villaroman, kinsang amahan mao si anhing PBGen Francisco Villaroman nga nagsilbi ubos sa iyang liderato kaniadto sa Philippine National Police kon PNP ug maoy nanguna sa security detail ni kaniadto Mayor Rodrigo Duterte hangtud sa iyang kamatayon dihang midaug si Duterte sa 2016 presidential election, maoy nagdala sa anak nga lalaki sa mga Discaya ngadto sa iyang buhatan sa Taguig City kondiin gi-imbitahan siyang mutambong sa grand rally sa usa sa mga lalawigan sa Davao Region.
Ang anak nga Discaya mao ang nominee sa party list group nga Ako Pinoy o Ako’y Pinoy – nga naningkamot nga makakuha og lingkuranan sa Kongreso ug dinhi na mi-uban sa maong hulagway sila Mr & Mrs Discaya.
Nangayo pa og dispensa si Lacson ngadto sa iyang higalang si Senate President Tito Sotto isip respeto.
Nasayrang pag-umangkon ni Sotto si Mayor Vico Sotto kinsa midagan ka-atbang si Mrs Discaya alang sa maong posisyon sa Pasig City, ug ubang mga party-list groups nga nag-apil matud pa sa iyang pangalan diha sa mga sample ballots.
Dugang ni Lacson, blangko siya sa mga Discayas kondiin mao matud pa kadto ang ilang una ug bugtong higayon nga nagkahimamat sila sa mga Discaya gawas sa Senate Blue Ribbon committee hearings. Natigayon matud pa ang ilang paghimamatay mga 15 ngadto sa 20 minutos ug dili matud pa human gikuha ang maong group photo.
Nanghinaut si Lacson nga maghatag kini og pagklaro sa bisan unsa mang mga hungihong nga gi-attach sa maong hulagway.
