BUTUAN CITY – Dili lang diay kitang mga tawo ang maka-sense og kamatayon ug gustong mulikay kutob sa malikayan pa, kondili apil na ang mga mananap.
Napamatud-an kini sa usa ka pamilya ning siyudad sa Butuan human nga ang bugtong nilang binuhing pato, nagpakita og pinasahing lihok dihang hukman na unta kining ihawon aron ihanda sa birthday sa ilang kabanay.
Sigon sa netizen nga si Wawang, kada-adlaw, diha lang sa palibot gawas sa ilang balay magbahis-bahis ang ilang pato nga si ‘Puti’ kansa gukud-gukuron pa sa ilang nag-inusara usab nga bata.
Dihang nadesisyunan nila sa bisperas sa birthday sa bata nga ihawon kini, natingala na lang sila nga wala na sa palibot ang maong pato.
Dako na lang ang ilang kakurat dihang atua na kini ibabaw sa ilang atop naglakaw-lakaw ug mudungaw kanila sa ubos apan wala gayod munaog. Dihang gisulayan nila kini pagkuha, mu-atras usab si Puti rason nga nagdesisyon silang dili na lang kini ihawon.
