BUTUAN CITY – Daghan matud pang mga kooperatiba sa Pilipinas ang galisod og bayad sa ilang obligasyon alang sa public utility vehicle (PUV) modernization program ngadto sa Development Bank of the Philippines (DBP).
Sumala ni DBP president ug chief executive officer Michael de Jesus, ang past due rate sa cooperative loan obligations misaka ngadto na sa 25% kansa ningresulta sa pagsuspende sa DBP sa ilang loan programs alang sa nasangpit nga mga kooperatiba.
Ang past due rate mao ang porsyento sa mga pautang nga wala mabayri sa saktong oras, sa mga nanghulam.
Sa dili pa magpahulam og kuwarta ang ilang ahensya, kinahanglang nasiguro na nga ma-aprobahan sa lokal nga kagamhanan ang mga route plan ug kinahanglan usab nga dunay dakong downpayment.
Sa kasamtangan, tinguha sa government-owned bank nga patas-an ang ilang authorized capital stock gikan sa P35 billion ngadto na sa P300 billion arun mapalapdan ang ilang credit assistance.
