BUTUAN CITY – Nagdesisyon ang provincial government sa Davao del Norte nga mopalit og kaugalingong suplay sa lana gikan sa Malaysia taliwala sa nagkagrabeng krisis sa petrolyo.
Sigon ni Davao Del Norte Governor Edwin Jubahib nga plano sa probinsya nga mag-angkat og hangtod 44 milyones ka litro sa krudo ug gasolina gikan sa maong nasud.
Napaabot na kini sa gobyerno sa Malaysia ug positibo ang ilang tubag sa hangyo sa probinsya.
Sumala sa gobernador, tungod sa dako nga oil reserve sa Malaysia, labi na sa crude oil ug gasolina, dali ra silang miuyon sa maong request.
Ang pag-angkat sa lana himuon isip one-time shipment ug target nga mahuman sa labing dali nga panahon.
Gipasiguro ni Gov. Jubahib nga adunay kapasidad ug kakapas ang probinsya sa pagpalit og dako nga kantidad o bulk order sa lana.
