BUTUAN CITY – Padayon pang gipakisayran sa mga hingtungdang local government units ang mga posibleng damyos nga hatud sa magnitude 6.4 nga linog nga mitay-og sa lungsod sa San Agustin, Surigao del Sur kaganinang alas-6:37 sa buntag nga karon gi-ubsan na sa magnitude 6.0.
Sa earthquake bulletin sa Philippine Institute of Volcanology and Seismology (PHIVOLCS), nasubay ang linog sa lokasyong 11-kilometros sa amihanang bahin sa lungsod sa San Agustin nga duna’y giladmong 58-kilometros ug tectonic in origin.
Nag-iyahay na og susi ang mga LGUs sa ilang mga areas aron masayran kung unsa kagrabe ang posibeng hatud niining damyos ilabina nga nabati ang intensity V sa Bislig City, intensity III sa Gingoog City, Misamis Oriental; intensity II sa Cagayan de Oro City; Surigao City, Surigao del Norte; Intensity I sa Alabel, Sarangani; Koronadal, Tupi, South Cotabato; Kidapawan City; Palo, Leyte; ug sa Borongan City.
Kusog nga pagtay-og usab ang nabati sa Butuan City ug mga kasikbit nga probinsya sa Agusan del Norte ug Agusan del Sur.
